Cor Sasslong

Salut dl sëurastant

Stimei letëures y apasciunei de nosc cor. Avisa 50 ani de storia ons da mustré su y chëi cun na gran atività. On abù l unëur de pudëi cianté te n grum de ucajions defrëntes sëura dut l mond!

La cumpëida de ciantarins fova feter for sëura i 30 ëi danter i 18 y i 75 ani, ma duc lezitënc al medem livel. Ulësse rengrazië dantaldut chëi che se à dat scialdi da fé per arjonjer y mantenì la cualità auta de nosta lia. Chël vëijen nce dai biei diploms che on pudù pië do te chisc ani pra de plu cuncorsc y olimpiades. Rengrazië ulëssi ënghe i dirighënc y i ciantarins che à cun gran savëi, scrit y adatà cianties per l cor.

L Cor Sasslong ie unì metù su per se la cianté y sté n bona cumpania, ti fajan de bon ala urëdles de duc chëi che nes scota gën su. Nce per l daunì me mbinci che abinon for inò ciantarins nueves che cun si bel cianté ti fej unëur y legrëza a nosc luech, a nosta valeda y nce oradecà.

Ve salude,

Lukas Perathoner
Sëurastant dl Cor Sasslong

Salut dl dirighent

Cun gran plajëi y legrëza pudons festejé i 50 ani dl cor di ëi Cor Sasslong. Son segur che i 50 ani de atività ie mé stac puscibli per merit de persones che à dat ca n grum de si tëmp liede per chësta lia, y chësc dal 1972 incà. Chëstes ie persones cun na gran mutivazion, creatività y na pascion sota per la mujiga. Do che son stat 14 ani alalongia ciantarin dl cor y chëi sota la bachëta de mi pere Willy, ei pudù sëurantò tl 2017 la ncëira da dirighënt.

Pudëi mené l Cor Sasslong ie per mé n gran unëur y l me dà na gran sudesfazion, canche vëije i biei resultac che l arjonj. Nia mé cuncorsc o de gran avenimënc me dà la mutivazion per fé inant, ma nce ti fé de pitla legrëzes ala jënt dl post ciantan Santa mësses, supeltures y vel’ pitl cunzert per i patins che vën for inò gën a nes scuté su.

Na gran fertuna de chësc cor ie che l vën do n valgun jëuni che porta povester tla grupa ënghe vel’ ideies nueves. Ma da mé ora iel mo l plu da “ti auzé l ciapel” ai ciantarins che do bën 50 ani, ne se à mo nia stufà de fé pert de chësta bela grupa. Ulësse tò l’ucajion de rengrazië nce i presidënc y si cunsëies che à te duc chisc ani laurà scialdi bën per ruvé a chësc pont, y ai doi vize-dirighënc Willy y Günther Runggaldier che me juda ora da vel’ supeltura, canche l ne n’ie per mé nia puscibl vester presënt. Me mbince che l Cor Sasslong vede inant mo n grum de ani y che la grupa reste tan na bela cumpania sciche ti ultimi 50 ani!

Samuel Runggaldier
Dirighent

Salut dl ambolt

L Cor Sasslong de S. Cristina festejea chëst ann si cincantejim aniverser. Te chësta ucajion ulëssi a inuem dl’aministrazion de Chemun y de duta la cumenanza purté i auguresc y i rengraziamënc a duc i cumëmbri che ie stac y che ie mo al didancuei pra chësta lia.

Pudëi cialé de reviers a tan d’ani de atività ie na bona rejon per fé festa. L ie segur stat n’ azion de curaje y de ambizion, chëla de mëter su tl ann 1972 l Cor Sasslong. Bëndebò prësc an udù che i cumëmbri dl cor ne fova nia mé scialdi mutivei a cianté, ma che i fova nce scialdi boni. L snait de tò pert a cumpetizions naziuneles y nce nternaziuneles ne n’à perdrët ënghedenó mei mancià. Daniëura ruvova nce i ciantarins de reviers cun scialdi de bon resultac. Truepes ie nce states la sëires de cunzerc y de bona ueia, ulache l cor ti à purtà de gran legrëzes ala jënt.

Te 50 ani se à mudà scialdi, n valguni purtruep ne n’ie nia plu danter nëus, d’autri cumëmbri à ntant lascià de cianté, ma on la fertuna che l ie daniëura ciantarins mutivei che vën do y che porta inant valores tan mpurtanc per nosta sozietà. Nosc cores y nosta mujighes testemunieia nce la vitalità dla populazion, per chël ti mbinci al “Coro Sasslong Chor” de pudëi jì inant mo giut cun chësta bela atività rengrazian de cuer.

Christoph Senoner
Ambolt de S. Cristina

Ultimi articuli

Prev / Next

50 ani Cor Sasslong

Salut dl sëurastant

Salut dl dirighent

Salut dl ambolt

Ultimi articuli