L fé pea pra na trasmiscion televisiva ie for stat n gran avenimënt per l Cor Sasslong. Tla storia dl cor se ala purtà pro che l à abù la puscibltà de jì bën diesc iedesc a cianté pra manifestazions defrëntes. Tlo se tratovela sambën de messëi se tò la dl’aurela de jì a tò su coche l ciantova.
Tl ann 1982 al abù l’ucajion de jì sun Mont de Sëuc per tò su per la trasmiscion dl ZDF “Die Musik kommt” cun Maria Hellwig. Chësta fova na trasmiscion scialdi cunesciuda y che plajova. Bën 2000 persones ie ruvedes adalerch su dal Hotel Panorama. Per duc canc na gran emozion.
Ntant iel passà de plu ani. L ann 1996 al fat pea pra trëi trasmiscions: cun l ZDF pra “Rund um die Sella”, cun l ORF pra “Wenn die Musi spielt” y cun SAT1 al ciantà pra n cunzert da Nadel. Ënghe l MDR n canal cunesciù ti Paejes Tudësc, l à nvià a cianté pra “Zauberhafte Heimat”.
N’ autra bela trasmiscion fova “Melodien der Berge” cun Michael Harles. Nce iló al pudù fé pea. Da lecurdé iel mo si partezipazion pra la trasmiscion sun l program MDR pra “Achims Hitparade”. Si ultima cumparida tla televijion ie stata cun Carolin Raiber.
Chisc ie propi stac de biei mumënc, l pudëi se lascé udëi tla televijion y l purté dant si cianties te de plu rujenedes.
Cor Sasslong