Viac a Busan – Corea dl Sud

Dai 19 ai 27 de utober 2002 iel unì purtà ora la segonda Olimpiada di cores. L gran avenimënt ie stat a Busan, zità cun 3,8 milions de abitanc tla Corea dl sud. Fat pea à plu o manco 200 cores de 40 nazions defrëntes, spartii su te 25 categuries. L sëul cor de Südtirol y de duta la Talia a tò pert n chël ann ala olimpiada ie stat l Cor Sasslong de S. Cristina, sota la bachëta de Sebald Goller. Granda ie stata la sudesfazion a pudëi pië do y a unì a cësa cun l diplom d’arjënt.

Per pudëi tò pert ala Olimpiada di cores che fova permò unida purteda ora per l prim iede doi ani dant a Linz y che da iló inant univa pona a se l dé uni doi ani, muessa n cor se cualifiché. L Cor Sasslong ova arjont chësta rejon bele l ann 1999 a Wernigerode am Harz. Do descuscions longes y do avëi giapà na cërta garanzia de n bel sustëni finanziel da pert dl’aministrazion provinziela à l cunsëi dl cor da ntlëuta tëut la dezijion de se scrì ite y de furné ala olimpiada tla Corea dl sud. N chëla ucajion iel ënghe unì nvià l  ambolt da ntlëuta Bruno Senoner, che ie nce stat plu ani ciantarin dl cor. Ai 18 de utober 2002 fovela pona tan inant y l cor ie pià via per la Corea.

Do feter 30 ëura de viac iel pona ruvà a Busan, na gran zità sun l mer. L prim bel avenimënt ie bele stat n lunesc ai 21 de utober 2002 ulache l ie unì giaurì ufizialmënter la olimpiada cun na bela festa che à durà 2 ëura. A duc i ciantarins ti al fat na gran  mprescion, canche feter 10.000 persones à ciantà l Inn olimpich di cores y riesc do ai mo sunà la ciampana dla pesc. N vënderdi ai 25 de utober 2002 fovela pona tan inant: dala 17:40 ti tucovela al Cor Sasslong a messëi purté dant si cater cianties per la  olimpiada. L dirighënt Sebald Goller ova cris ora per chësta ucajion: “L ie nuet” de Stefan Demetz, “Le plaisirs sont doux”, “Cantate Domino” de Vytautas Miskinis y “The little green lane”, ciantia d’ amor dl Irland. N possa bën dì che la à butà y che la sudesfazion  ie stata granda, canche n à audì che l Cor Sasslong ie unì premià cunl diplom d’ arjënt.

Per l Cor Sasslong ie chësta stata n’esperienza da stramp positiva: bele l fat de pudëi tò pert a na olimpiada ne n’ie nia zeche da uni di. L pudëi mo se ancunté cun n grum de ciantarins de duta la pertes dl mond ie stat zeche da stramp de bel.