Canche na lia festejea l aniver-
ser di 50 ani vëniel daniëura cialà de reviers ai mumënc y ai avenimënc de majera mpurtanza y nce ai miëur resultac arjonc.
Coche cumëmber che ie bele dal scumenciamënt incà leprò
pra l Cor Sasslong uei ti dé n’udleda a na pert povester nia tan cunesciuda, ma nia manco mpurtanta: la proves.
Dal mumënt che te chisc 50 ani iel unì fat passa 1500 proves, possen se nmaginé tan d’ ëures passedes deberieda, tan de
lecorc che n à.
Me
lecorde dla prima proves dl autonn dl 1972, ulache fan mo de puec y che
fajan te stua de bera Engl dal Ampezan, che fova nosc prim dirighënt.
An mparà ite, sambën cun l aiut de si pitl armonium, la “Montanara” y
pona “Wohl auf...”
La butova y l ntujiasm chersciova y cun chël ënghe
la cumpëida di ciantarins. Tosc ne n’ans nia plu lerch tla pitla stua y
perchël ons pudù ite tl local dla proves dla mujiga y dl cor de dlieja
te chemun basite, ulache son mo ncueicundì.
L local fova dant stat l
prim ufize dl scipas y ne fova nia propi adatà: l fova plutosc frëit y
scur, cun n fonz de sas y cun na stleta acustica.
La proves fova for
de vënderdi y do la rata lesieres: metù man univel da mesa la nuef, da
mesa la diesc fovel bele la gran paussa ulache duc se la mpiova, sambën
te local, y se buvova zeche. Do chël se sentoven mo n iede ju per l
ultim chert d’ëura per na pitla repetizion y vel’ un ova mo na boza da n
chert dlongia stuel da se bever ora y magari mo l ultim tòch de na
zigareta che fumova, lasceda sëura sun stender dla notes.
Do prova
restoven mo gën te local a se la ciaculé. Te cërta grupes garatovel for
d’uni sort de descuscions nteressantes, i jëuni scutova su y l ti savova
da rì, coche l univa metù a pën y suvënz sëuramenà vel’ argumënt ora
dla set mesures.
Gën univel nce cartà, stuei nen fossel bën stac
assé, ma l manciova la mëises. Nsci an abinà ca dal bar Sport de tel
pitla mëises de banda dla “Cinzano”, che fajova drët bën l fat.
Su
per i ani otanta, tl tëmp dl boom turistich, univel de sajon mo gën
tlamà do prova: iló ne univel nia mé ciantà na viva, ma iló garatovel
suvënz mo na prova bis (a chëla maniera ons mparà a cianté dut adamënz).
Ai turisć (suvënz sa Maciaconi) ti savovel bel y nia ngërt ruvova sun
mëisa tant de tel bona bozes de vin dl “Fass Nr.9”, che messan se les fé
mëter via al vënderdi do.
Do y do fova l livel dl cor for miëur y
davia de chël oven scumencià a fé pea pra vel’ cuncors mpurtant. Per se
njenië ca univel pona purvà dassënn y cun gran ardimënt. Ti ani 1990
fovel unì tëut su nce CD, iló fovel sambën da fé proves sëuraprò, datrai
univel nce tëut su ntan la fin dl’ena.
Nce l local ie cun l tëmp unì
njenià ite drët bën, cun parëies aposta per miuré l’ acustica,
paladines te de plu autëzes y njins tecniches a sustëni de nosta
atività.
Al didancuei ie la proves dal pont de ududa dla mujiga plu
prufesciuneles, ënghe sce l ne mancia pa mei vel’ batuda da rì y uni
tant na bela viva per l cumplì di ani de nosc cumëmbri o per vel’ autra
ucajion.
Do prova ne se tënien nia plu su giut te local, ajache
trueps lëura tl ciamp dl turism y sà che l di do, la sada, iel n di
pesoch.
Purempò iel for mo per n grum la sëula ucajion per se
ancunté, de se udëi inò n iede te n tëmp ulache la dl’aurela semea
deventeda for mëndra.
Coche l rest di tëmps se ala nce n pue’ mudà
pra la proves dl cor. Cie che ie restà medemo sciche dan cincant’ ani ie
l se purvé, l respet y l tenì adum danter i jëuni y chëi manco jëuni,
che ie da for n pue’ l sucrët dl’
armunia y dl suzes de chësta lia.
Ad multos
annos
(y proves) COR SASSLONG
Bob
Cor Sasslong