ENGL RUNGGALDIER
Ampezan
1972 – 1974
Ël fova l prim
dirighënt dl Cor Sasslong y l fova pra chëi che ova metù su l cor l ann
1972, che ël à pona menà nchin l ann 1974. L ie segur nia stat saurì,
davia che l ne fova degun local per la proves. Nsci univel purvà do l
lëur te si stua tla cësa Desiree.
FERDINAND INSAM
Culac
1975 – 1984 y 1986 – 1989
Nando
coche duc l tlama, à scumencià pona l ann 1975; ël fova bele pra l cor y
ciantova bas segont. Da iló inant al dat la batuda nchin l ann 1984 y
dal 1986 al 1989; de ndut bën 14 ani. For cun gran lezitënza y pascion.
Cun ël à l cor nce tëut su la prima vëta tl studio dla Rekon a Maran.
For cun ël al fat la registrazion dla segonda vëta l ann 1984.
GÜNTHER RUNGGALDIER
Ampezan
1985 y 1990 – 1994
Canche
Nando ova lascià ala fin dl 1984 fovel da crì n dirighënt nuef y chël
ne fova nia saurì da abiné; Günther ova pona dit che nchin che n abina
nia n nuef, fejel bën ël y nsci ovel menà l cor per un n ann. L ne ti
savova nia saurì. L ann do fova inò unì Nando nchin tl 1989; iló ovel
pona lascià defin. Dal 1990 al 1994 se ova Günther inò tëut su la ncëria
da dirighënt.
HANSI MALSINER
Tervela
1995
L cor
fova inò restà zënza dirighënt. Hansi fova pona sautà ite per ntant y l à
fat dut l ann 1995. Hansi ie for stat n gran apasciunà de mujiga, l
sunova nstës la vidula y l ie stat n grum de ani nce dirighënt dl cor de
dlieja.
SEBALD GOLLER
Bula
1996 – 2002
Do che n à
cris giut n dirighënt nuef iesen stac boni de abiné Sebald; ël fova
bele dirighënt dl cor de dlieja da Bula. Sebald fova n dirighënt drët
avisa y nce n pue’ rigurëus, ma n possa dessegur dì che l cor ie miurà
de livel tres ël. Ël ie stat ndut 7 ani a cë dl Cor Sasslong, dal 1996
al 2002.
WILHELM RUNGGALDIER
Ampezan
2003 – 2016
Nosc
bon solist Willy coche i ciantarins ti dij, à tëut l cor tla mans tl
ann 2003, se dajan ju cun ueia, mpëni y legrëza. Si gran savëi y si
pazienza cun i ciantarins à purtà pro che ël mëine l Cor Sasslong per
bën 14 ani. Propi te chisc ani à l cor da mustré su de biei y de bon
resultac. Cun ël an fat 500 proves, 429 manifestazions, mparà ite 154
cianties nueves y ciantà 3076 cianties un o plu iedesc. De gra.
Cor Sasslong